L’ISTITUT

FODOM

L OBIETIF

L Istitut Cesa de Jan l promuof, l valoriseia e l straverda l’identité culturala e l lengaz ladin, souradut l laora e l mët a jì chëste ativité:

• l studio scientifich del lengaz, de la storia e de la cultura dei Ladins de le Dolomiti n colaborazion con de autre Istituzion scientifiche e universcitarie taliane e da foravia e deberiada co le autre associazion culturale;
• l dáida a douré l lengaz ladin scrit e descorëst n colaborazion co le aministrazion publiche e le scole;
• l ten su e l ciala davò a la cultura ladina, l la fesc cugnësce e svilupé nte dute le maniere poscibili col scrit e col descore per mez de mass-media, publicazion, scric, nrescide;
• l tòl su e l archivieia via dut l material che auda pro la storia, l’economia, l lengaz, l folclor, la mitologia, i guánc e le usánze; l dut da lascé a disposizion de la jent o n esposizion ntei mujei;
• l mët a jì cors de alfabetisazion per gragn e pichi, ence auna co le scole, per chël che reverda l lengaz ladin e todësch;
• l promuof e l mët n pe manifestazion dalvierte de nteresc turistich-cultural e storich-cultural;
• l dáida a mané nnavánt dute le ativité che le vol promuove per la popolazion manifestazion culturale, ricreative, musicale, artistiche, editoriale, sportive, convegni, spetacoi, escurscion;
• l valoriseia le tradizion ladine;
• l dáida fora e l dà nformazion storiche e culturale a sciori e paesagn;
• l promuof la comunicazion e l amizizia nánter Ladins de le Dolomiti, de la Svizera e del Friuli, per tignì su la continuité culturala e l’unité aministrativa dei Ladins de le Dolomiti che fesc pert de l’area storica brissino-tirolese.
• vigni autra ativité ritegnuda conforme ai fins del Istitut; se ten a diment che l Istitut l é n ente senza l fin de vadagné.

ANPEZAN

EL SCÒPO

L Istitut Cesa de Jan el laora par fei conosce, valoriśà e tutelà r’identità de ra cultura e de ra parlada ladina.

I scòpe del Istitut, e donca r’atività istituzionales ‘ś’é:

• studià a liel scientifico ra parlada, ra storia e ra cultura dei Ladis de ra Dolomites aduna ai istitute scientifiche e de r’ università nazionales e forestes e in cooperazion con outra asociazios e ente culturales;
• dorà el pi poscibel ra parlada ladina par iscrito e ra parlà, se poscibel anche in colaborazion co ra aministrazion publiches e duta ra scores;
• conservà e tutelà ra cultura ladina e fei conosce e svilupà in dute i mode, ra parlada ladina par iscrito e parlada sui mass-media, fei conosce i libre, i scrite, ra rizerches;
• sturtà su, bete in ordin, studià, e valoriśà anche co ra jestion direta dei muśee, el patrimonio material e imaterial che parla de ra storia, de r’economia, de ra parlada, del folklore, de ra mitolojia, de ra uśanzes de ra śente ladina;
• r’organiśazion de un programa de corse par i grei, i tośate e i pize, anche in colaborazion co ra scores, par ra parlada ladina e todesca;
• fei reclam e fei manifestazion publiches de intareso turistico-cultural e storico cultural;
• fei ogni sorta de atività par fei conosce a dute cuante e organiśà par ra śente, manifestazion culturales, ricreatives, musicales, artistiches, editoriales, sportive diletantistiches, convegne, spetacole publiche, jites;
• valoriśà ra tradizios del posto;
• responde a ra domandes e dà informazion storico-culturales ai turistes e a ra śente del posto;
• leà senpre pì i raporte intrà i Ladis de ra Dolomites, de ra Svizera e del Friuli, coscita da portà inaante ra cultura e r’unità aministrativa dei Ladis de ra Dolomites che i fesc parte de r’area storica brisino-tiroleje;
• ogni outra atività che pode dià a darśonśe i scòpe del Istitut: da fei notà che l Istitut l é un ente senza scòpo de guadagnà.