100 Agn de la Bandiera Ladina

La Bandiera Ladina la sventolarà ence ntel davignì!

 

Avarala ncora ceze da ne dì, nosta bandiera, davò 100 agn?  La tentazion fossa chëla de cialé demè ndrio e recordé dut chël che la Bandiera Ladina l’à passé e l’à raprejenté nte suo prum scecol de storia. Mi crei che ncuoi no podonbe se pierde ntel conté cotánte batalie politiche e culturai che l é sté fat n suo inom (ence se no podaron mei se l desmentié), ma mosson nveze se damané ci che la Bandiera Ladina l’à ncora da ne dì e ci che la pò raprejenté per l davignì.

Al di da ncuoi i Ladins i é tres plu despartis: spo l prum valour de la bandiera l é segur l’unité nánter le cinch val ladine, l medemo de davánt 100 agn! Chi che crei nte la Bandiera Ladina, crei che chëst popol, che à le medeme reisc storiche-culturai e l medemo lingaz, l abe l derit de sté auna no demè dal pont de veduda cultural, ma ence e souradut, politich e aministratif.

La Bandiera Ladina no la raprejenta n lingaz, no la raprejenta la jent e la cultura da mont n general (coche valgugn disc), no l é gnánca n stempel de n’associazion o de n partit politich. La Bandiera Ladina l é n simbol de n popol che per scecoi e scecoi l à vivëst auna sot la medema aministrazion e che na lege fascista à despartì. L é l simbol de n popol che bele cënt agn fesc se consideráva n grop etnich a pert, percieche ne talián, ne todësch.  L’unité de n popol: chëst la bandiera reclamáva co l’é nasciuda ai 05 de mei del 1920, chëst la damana ncora al di da ncuoi.

N valgugn dis fesc, nost Assessor Ladin Daniel Alfreider à recordé duc i gragn varesc che Badioc e Gardener à fat nte chisc 100 agn e i gragn resultac che la Politica (co la P grana) à arjont: ntel Südtirol i ladins i à suo riconosciment coche popol e degugn mët plu n discuscion che siebe trei grop “etnico-linguistizi” desferenc. Chëst l é n suzes de gran valuda, che degugn pò desmentié o dé per sconté; chëst forsci l eva plu o mánco l obietif che ava ntel ce i setánta raprejentánc de le cinch val ladine, 100 agn fesc, sul Gherdëna. Spo ncuoi podonsa dì che doi val su cinch (o trei su cinch se meton laprò ence la Val de Fascia) à realisé na bona pert de le ambizion raprejentade da la bandiera.

E po son nos, Ladins de Souramont (e forsci con nos ence i Fasciagn), che sceguiton a ie cialé al Südtirol… e, puoch ma segur, nosta bandiera sventoleia de chël viers. Se chelche (o ence: velch viade) viade l vent à soflé del mel viers, chël l é sté segur n fal!

Nos, che mosson damané per piazer de podei nsigné nost lengaz nte scola. Nos, che no podon avei na mëssa dita su per ladin. Nos, che son considerei “rigurgiti etnici”. Nos, che vivon nte na tiera che davò 100 agn valgugn ncora clama “terra redenta”. Nos, che vigni di mosson se paré da na cultura venetica che ne volëssa duc valis, magari duc fioi del leon de Sán Merch. Nos, che no ne ven gnánca garantì chël che l é pervedù da la Costituzion (basta pensé al Referendum del 2007). Nos, che son comanei da na politica (co la p picola) che no sà gnánca chi che son e ulache ston e che considereia nosta tiera demè coche n louch ula vignì a se giaude, ulache basta paié e avei i scioldi e pò s’é parons de fè ci che se vol senza damané nia a degugn.

Eco, nos savon ejato ci che ne disc ncuoi nosta Bandiera: la ne disc de tignì dur e de tignì auna co le autre val ladine, davánt che nosta identité e nosta cultura le vegne deldut sopersciada. Zerto l é, che fin che saron stolc de nos nstësc, de nosta storia, de nosta cultura e de nosta identité e sceguitaron di per di a volei ben a nosta tiera e a nosta comunité, nlouta podon ester segur al cënt per cënt che nosta Bandiera Ladina la sventolarà ence ntel davignì!

Web Design & Dev. :Produced by Casanova Design